黃翠如及蕭正楠爆出「翠蕭戀」後，負面新聞多籮籮，先係話黃翠如係小三，介入蕭正楠同何傲芝嘅戀情，跟住又話何傲芝拜金兼劈腿，總之好睇過啲宇宙膠劇！噚日黃翠如出席喺將軍澳舉行嘅世界盃活動，見到黃翠如仲笑得落，睇嚟呢排啲是非傳言冇影響佢嘅心情。
冇計劃結婚
自稱係讀者嘅翠如BB，講到有報道話佢同蕭正楠秘密結婚，佢就話：「𠵱家嘅版本比我諗嘅豐富，每日都會follow劇情，不過就冇計劃過結婚，我唔係嗰啲有計劃嘅人。」翠如BB話冇諗過閃婚或者同居，𠵱家都係畀心機工作。但係有啲咁嘅新聞，有冇影響戀情先？翠如BB好坦言話有keep住聯絡，不過私人嘢就唔講住：「我想繼續一直以來好簡單嘅生活。」咁有傳情敵何傲芝其實已經另結馬主新歡？佢話：「人哋嘅嘢唔回應。」有高層撐嘅翠如BB仲話好感激每個錫自己嘅人，唔知蕭正楠又有冇安慰呢？佢就冇正面回應，只係話：「OK嘅，自己做呢行，當故事咁睇。」咁會唔會公開戀情呀？翠如BB話：「呢個問題好深。」至於會唔會因為蕭正楠嘅維護而加分？佢就笑住話：「我感激㗎！我感激㗎！」另一方面，對於周刊嘅報道話蕭正楠踢爆與舊愛分手嘅死因，佢喺微博留言話：「我完全不理解不知情亦從來沒有作過任何回應，祈求事情盡快告一段落！」
撰文：馮仁昭
