寸爆新界土豪嘅《竊聽風雲3》就快上映，戲中老牌演員曾江嘅角色疑似影射鄉議局主席劉皇發，當事人發叔噚日笑笑口話冇所謂，因為香港有自由，但自己就冇乜興趣入戲院捧場嘞。問到新界人擔唔擔心俾人竊聽？發叔話唔出奇；至於係乜嘢人？咪就係「有心人」喎。疑似係戲中劉青雲角色現實版嘅上水鄉委會主席侯志強，對呢套戲有興趣得多，拍心口話請發叔睇戲之餘，仲自信爆棚咁話喺「型」呢一方面，同劉青雲各有千秋。問佢擔唔擔心俾人抹黑？佢話覺得抹黑咪告佢囉，但當然唔會郁啲就告，反正拍戲嘅嘢都係得啖笑。元朗十八鄉鄉委會主席梁福元反應冷淡得多，覺得拍戲有時都係譁眾取寵喎。