近排比較靜嘅愛港之聲，噚日主動邀請傳媒茶敍。主席高達斌凳都未坐暖，就一邊幫行家斟茶、一邊好開心咁宣佈，佢哋個網頁開張嘞，話網頁除咗用嚟更新活動動態，仲整咗個網上烽煙平台；副主席Jessica話，寫稿嘅人「有《ATV焦點》水準」。八方入去睇過，每篇文章都有百幾點擊率㗎，收視都拍得住ATV水準。
早前提出咗政改方案嘅愛港之聲，原來已經成立咗政策研究部，話未來會做更多政策研究。高達斌仲話呀，政改一定會跟《基本法》落實，預告泛民有人「回頭是岸」，仲話「好欣賞佢哋」。到底係邊幾個？高生未開口就俾其他成員叫住，話唔講得咁話。