亞視滾筒式重播《我和殭屍有個約會》系列，令人懷緬亞視昔日的人和事。黃璦瑤（瑤瑤）是亞洲電視全盛時期400藝人的其中一員，她在亞視土生土長，演藝生涯15年全部奉獻給亞視，卻換來一次又一次的失望，無奈分手收場。放下藝人的包袱，瑤瑤毅然走出錄影廠，換上一身黑色行政套裝，任職高級經理，學習市場營銷、機會分析、戰略規劃、人才管理，對市場學亳無認知的瑤瑤，一切從零開始。
撰文：楊潔雯
瑤瑤記得在2009年離開亞視，她說：「到09年越嚟越冇劇拍，真係好擔心，好似冇乜嘢發展咁，又開始簽好多新同事，我哋呢啲叫做簽得耐，人工就可能貴咗啲，最後大家就冇續約。」亞視無劇開，又減製作，開始走下坡，瑤瑤知道自己幾時要退：「係個天安排畀我，畀一個開始我，上大陸登台同人合作做MC同時幫手做製作，朋友見我對舞台嘢有認識，叫埋我合作，做咗十幾年藝員，係擔心可唔可以幫到人哋，驚自己做唔做得嚟！」
比拍劇更加困難
瑤瑤轉做市場推廣五年，早前加入了一間韓國護膚品牌公司任職高級經理，負責市場策劃、營銷等工作，新手牌的瑤瑤，靠人脈和幹勁迎戰，她說：「以前工作淨係同自己交代，拍劇我只要讀熟劇本，演好個角色，點樣同對手合作，只要過到自己嗰關，係容易啲。𠵱家出嚟做嘢嘅合作方式，同好多人交代，𠵱家責任大好多，好多人睇住你做嘢，我要諗埋佢哋感受，要諗老闆、公司政策，我希望每一方面都可以平衡，係要做好多工夫。問心我覺得係難啲，做藝員係可以冇朋友，我做好功課，然後準時返工，其他人唔會理你。𠵱家就要同人交代，仲有好多嘢學，基本上仲覺得好缺乏，只係憑自己idea去做。」
兒子生病當笑話
工作要全情投入，少不免會忽略身邊人，瑤瑤對7歲囝囝有一份遺憾，她說：「我個仔，我唯一嘅遺憾，係我做呢份工時間好長，變咗我相對放喺小朋友嘅時間就少咗好多，有時我夜返，就真係冇活動，咁可能佢啲功課攤喺枱面度，等我返嚟，真係好心痛。」
瑤瑤更說了一個跟兒子有關的笑話，她含淚苦笑說：「有一次好笑，我返到去佢坐喺功課枱度，我問佢仲未做晒功課呀？佢話係呀！我等你，我見佢兩行鼻涕，就叫佢抹咗先做，跟住佢話『媽咪，我可唔可以睇醫生呀！我好病呀！』我真係好遺憾呀！但係我又唔想畀佢覺得好大件事，咁我就叫佢食兩粒維他命先，不過個心就好唔舒服，好衰！覺得自己冇盡本份去照顧佢，可以咁講，如果我要放棄𠵱家做嘅嘢，最大因素係我個仔，因為我feel sorry。」
