唯一一支歷來喺德甲從未降班嘅金漆招牌，漢堡有驚無險總算保得住。漢堡喺今季德甲，淪落到要踢升降班附加賽，周日次回合賽事作客德乙嘅格雷特霍夫，由拉蘇加（左）先開紀錄，攞到寶貴嘅作客入球，到下半場霍夫嘅富斯特拿入波扳平，之後不斷向漢堡狂攻猛打，好在漢堡門將杜布尼幾次勇救險球，最後頂得住兩回合計都係1:1，漢堡靠作客入球成功護級。