財政司司長曾俊華帶頭，連日來高官接力向拉布議員發炮，令立法會主席曾鈺成「剪布」增添壓力。八方聽聞，剪布戲軌一早寫好，最遲本月要通過預算案，曾鈺成日前都講明，同各黨派議員會面後評估，好有可能喺5月底完成審議。
將餘下合併辯論時間封頂
曾鈺成噚日再徵詢議員意見，有份拉布嘅人民力量陳偉業話，對方提出將餘下三場合併辯論時間封頂，每場限時10個鐘，佢當然反對啦，覺得咁做極不尊重立法會；另一拉布議員，長毛梁國雄就批評做法係等同剪布。
據了解，曾鈺成嘅如意算盤係今個星期三、四、五延長會議至晚上12點，即係一日開多兩個鐘，咁就完成到三場合併辯論，到下個星期三開始進入投票，單係表決都要用四日左右，佢問埋議員可唔可以下周五通宵開會，就算計埋納入、三讀發言，仲有望趕喺5月完成審議。
不過，民主黨表明反對，一來議員冇時間休息，二來擔心會阻礙會議運作，另一邊廂，建制派「班長」葉國謙都問緊議員意向，初步覺得今個星期每日加一個小時已經好夠，佢個人贊同下周通宵投票，另有建制議員無奈表示「預咗」。
就睇吓曾主席係咪又會「返嚟就郁」。