新世界發展（017）私有化新世界中國（917）的交易，上周五晚上終於出了股東通函。根據獨立財顧發出最新的估值報告，新中的淨資產值（NAV）突然獲大幅提升50%；單係物業重估的差額，就高達424億元！呢個轉變，令新世界由原先「買貴嘢」，變成𠵱家好似係「執平貨」。新世界嘅世界，就係如此變幻莫測！俾你估得到，佢仲係純官嚟嘅？
其實NAV突然好似「海鮮價」咁急升，反映咗一個事實：就係新中這10多年來，真係hea得極之緊要。新中的物業組合，有高達64%，都是打算出售但又未賣出的物業，當中包括已經落成、發展中和尚未發展。即是新中多年來，買落唔少資產，卻長hea喺到、嘆慢板咁發展或出售。由於這些資產是用成本價入賬，故賬面值便宜，才會導致今次重估，出現咁大嘅差距。
未必真係咁抵買
咁多項目要攤長來發展，背後可以有好多原因。是唔憂賣，還是唔容易賣？相信只有新中自己清楚。一般物業重估，都是按現時市況，去評估物業未來可出售的價值。但現時內地樓市正步入調整期，未來在內地賣樓，係咪仲咁易賺錢？新世界今次用0.68倍book去私有化新中，相信這個程度的折讓，已合理地反映了樓市的風險。只是這宗交易，未必會如數字上睇落咁抵買。
海迪