全球最頂尖嘅拉丁舞及標準舞好手，5月31號將雲集灣仔新伊館，角逐第2站嘅世界體育舞蹈大獎賽。噚日舉行嘅記者會宣佈，香港將派出202人參賽，好似中三女生屈雅汶（左）就係其中一位生力軍，佢同拍檔、讀緊中四嘅翟傲邦（右）懶理每個月使幾千蚊請教練、租場練習、犧牲同同學玩嘅時間，仲未計身上過萬蚊舞衣，都係為咗可以同世界排名前16位舞者同場較量。