內地兩大call車App，騰訊（700，臨時編號2988）投資嘅「嘀嘀打車」及阿里嘅「快的打車」，幾乎同時宣佈，上周末起取消向乘客補貼，表示呢場歷時四個月嘅燒錢大戰暫告一段落。
Call車App近年於世界各地，可算為的士界帶來風起雲湧變化，司機可減低「吉車」機會，又可及早安排路線，慳返唔少油錢。騰訊、阿里今次取消補貼，相信唔係因為佢哋冇錢燒，而係好多人已用慣咗個App，客戶群已做得夠大了，相信未來雙方會推出新橋留住班客。
聽到取消補貼，你以為最唔着數嘅係乘客？咁就錯喇。聽講取消補貼後，唔少內地乘客搵車時，用App call之餘同時又喺街截，雙管齊下，既方便，又快捷。搞到司機投訴話多咗好多客甩底，嬲嬲哋索性uninstall個App。不過有多個App幫手都好過冇，料司機最後死死哋氣裝返機會達99.9%。
當內地的士App越做越起勁，外國Uber、Lyft又攻陷越來越多城市，但何解偏偏香港冇一個的士App做得起，反而貨van App「GoGo Van」就越來越紅？講真香港好多人call車都係為八折，否則非繁忙時段，喺街截咪仲好。咁你話繁忙時段你會call車，都話明peak hour，一車難求。客路咁窄，冇人揼水大搞，非常合理。
Fifi
本欄逢周二、四刊出