澳門已經有條大馬路叫做「何鴻燊博士大馬路」，作為前宗主國嘅葡萄牙政府，為表揚「賭王」何鴻燊對中、葡、港、澳嘅商業同文化交流貢獻，最近仲將葡萄牙駐澳門總領事館嘅演講廳命名為「何鴻燊博士演講廳」。葡萄牙總統卡瓦科．席爾瓦前日趁訪問澳門期間，親自為呢個演講廳剪綵，令賭王可以再喺澳門留名。
不過賭王喺幾年前跌傷頭部後，已經好少公開露面，今次演講廳命名儀式，佢亦都冇現身，交由二房長女何超瓊、四太梁安琪同埋佢嘅愛將、澳博（880）行政總裁蘇樹輝代為出席。
講到蘇樹輝，話晒佢跟咗賭王咁多年，喺促進中、葡交流方面都有唔少功績，今次老闆獲嘉許之餘，佢亦好巴閉，獲頒「葡萄牙司令級功績勳章」，蘇樹輝本身係全國政協委員、葡萄牙駐港名譽領事、澳門陸軍俱樂部理事會主席，𠵱家又多一個名銜。