「飛鏟鏟中波梗唔使foul！」、「隻手掂到波一定要吹手球！」、「隊長唯一有權向球證抗議。」、「門將出迎時掂到前鋒隻腳先，一定12碼啦！（圖）」以上幾句「球例智慧」，到底邊幾句係真？答案係：全部都真唔晒！
感謝足總裁判經理張炎有導師熱心協助，為香港足球評述員協會舉辦了「FIFA最新球例研討會」，除為會友釐清很多球例灰色地帶，亦講解了國際足協對多條球例的最新定義。例如：守方飛鏟縱使鏟中波，如動作有危險性一樣可吹罰兼黃牌；手球最新定義包括球員的手要有蓄意動作(deliberate)，或處於「不自然」位置（如舉高了），如手放在胸前近距離被省中，而手沒有用力，球證便未必會吹罰。而無論隊長、球員還是教練，亦無權在球賽中向球證理論的！
為打擊插水，門將出迎時如動作全心去波，而接觸力度明顯不能撞倒對手（即對手蓄意放軟隻腳讓門將「撞」中），縱有接觸，現亦未必吹罰，反有可能吹插水呢！總括來說，球證除以往球例，還要在瞬息萬變的球賽中判斷球員啲手係咪喺「自然位置」、球員跌倒有冇做戲，所要求的集中度和分析力係接近瘋狂！而且體能要求極其嚴格，故頂級裁判都有年輕化趨勢。本屆世盃，較新鮮的是球證會於禁區外罰球畫一條白色10碼線，杜絕「人牆自動前移」。所有世盃球證現都要孭着這支噴漆來受訓呢！
方柏翹
now足球評述員