中環滙豐總行噚日收市後好墟冚，唔係有人預演佔中，而係滙控（005）舉行「非正式股東會議」，吸引600名小股東出席，佢哋乖乖守秩序排隊上總行28樓開股東會，因而出現呢個打晒蛇餅嘅場面。
小股東開完會離開，落返地下就會獲派一盒設計精美嘅餅，由於離開時間，人人唔同，攞餅就冇出現人龍。呢盒餅係匡智會出品，餅罐上面有本地著名插畫家b.wing嘅可愛公仔，食完仲可以用番個罐。
股東會上亦有趣事，有小股東提問時，講到行政總裁歐智華，點知唔小心將歐智華，講成「曾智華」，唔知佢係咪太掛住呢位已退休嘅電台節目主持人呢？
此外，有小股東對於呢個「非正式股東會議」有意見，指滙控嘅香港小股東人數眾多，但股東會竟然叫做非正式股東會議，呢個名實在非常咁惡劣咁話。華華見到帶住耳機聽繙譯嘅歐智華聽到呢度，笑咗一笑，但就冇回答。