【六四25周年】
【本報訊】這些年，「反蝗」與「城邦自治」崛起，任何關顧內地人民福祉的言論，總會觸動某一群香港人的敏感神經。早前一篇〈誰是「反蝗」的真正受益者〉文章，以香港六四燭光集會消息往國內推送為例，說明中港互相蔑視只會讓中共得益，文章發表後隨即惹來網民圍攻，「垃圾」、「低能」之聲此起彼落。
維園的燭光已燃燒了24年，近兩年卻成為「本土派」口中的「邪神祭壇」，非要把維園六四集會從香城中切割出來不可。《蘋果》找來反對繼續舉行集會的「驅蝗行動」召集人梁金成，與支持一方的學聯前副秘書長林兆彬，分享雙方的觀點。
記者：蔡元貴
林：林兆彬 梁：梁金成
為甚麼要悼念六四？
「係一個反思活動多於悼念」
梁：當年我讀緊中二，最初唔係好清楚班人做緊乜，後來老師講番先知係為咗反腐敗。我認同當年學生嘅努力，但係對我嚟講，六四唔係好大感覺，所以每年六四我都冇出席任何悼念活動。
六四對我嚟講係一個反思活動多於悼念，反思嘅結論係，共產黨信唔過，如果權力受到威脅，佢哋會好冷血咁殺害人民，所以捍衞一國兩制非常重要，呢個係保護本土人嘅一道欄柵，如果冇咗，六四好大可能會喺香港發生。
「係一個公民教育場所」
林：89年我仲未出世，只從父母口中同歷史資料得知當年發生嘅事。到中六嗰年，我首次參加維園燭光集會。對我嚟講，六四集會係一個公民教育場所，我就係因為中六參加第一次維園集會，先至開始關心人權民主。
維園燭光集會係接觸社運嘅第一課，參加者會反思點樣改變社會。學民思潮好多同學都係參與過維園集會而開始關心民主，中共理應唔想見到咁多人悼念六四。
公式化的問題
「六四、7.1先出嚟，就叫推動民主？」
梁：我覺得香港咁多年嘅集會，已經變咗係一個負累。97年後香港繼續有悼念六四活動，係一國兩制象徵，但係久而久之就變咗做騷。我上年去過維園集會，嘗試了解。一出港鐵站，就見到好多籌款攤位，感覺係一個年宵，裏面班人覺得集會對香港民主進程有幫助，我唔覺得幫到。
所以我覺得維園集會唔應該繼續搞落去，每年嘅六四同7.1已經變咗香港人嘅贖罪券。平時佢哋唔關心政治，每年六四、7.1先出嚟，就叫推動咗民主？好似啲人平時唔睇書，一到書展就撲去排隊買書。
「表示我哋冇忘記呢段歷史」
林：如果話似年宵，我諗7.1比六四集會更加似年宵。我覺得喺六四集會擺街站係可以接受，民間社會要發展，錢好重要。佢哋每年只得三次會公開街頭籌款，支付一年嘅經費。而佢哋賣嘅刊物、T恤，都有紀念作用。
我唔否認有啲人真係平時唔上街，每年只參加六四集會，但係咁樣唔代表六四活動起咗維穩作用。反對維園集會嘅人又有冇做統計，有冇數據支持參加者大多數係嚟贖罪嘅講法？每年嘅六四悼念活動，係表示我哋冇忘記呢段歷史，反對獨裁政權，係一種抗議，咁樣都算維穩？
支聯會有啲地方值得檢討，但係中國香港民主人權有冇改善，最大責任不在支聯會，而在中共政權。支聯會嘅角色主要係教育，唔係行動，香港仲有好多發起行動嘅民間組織。
六四唔關港人事？
「汶川地震呢？又唔見有人每年悼念？」
梁：我認同悼念六四係良知嘅表現，咁但係西藏呢（2008年血腥鎮壓）？汶川地震呢？又唔見有人每年悼念？我覺得香港喺97後已經步向赤化，點解唔保護好自己嘅生存空間，反而擔心人哋嘅嘢？自己都未搞得掂，悼念六四係嘥時間。所以平反六四，內地人自己爭取就得，唔應該靠香港人爭取，我哋爭取咗咁多年都爭取唔到，浪費時間。
身邊都有朋友反對悼念六四，認為唔關香港人事。佢哋嘅諗法係六四係人哋國家嘅事，唔關我哋香港人事。
我了解咗六四事件咁多嘢，都仲係覺得唔關我事。而六四25周年對我唯一嘅意義，就係應該學習當年嘅北京青年，行出來用行動爭取自己權益。但係六四集會係本末倒置，喺度唱歌、嗌口號，中共就會改變？我睇唔到有作用。
「我哋冇時間可以悼念咁多嘢，梗有一個優先次序」
林：點解西藏鎮壓同汶川大地震又唔見有大規模周年悼念？因為89民運期間，香港人嘅投入好浩大。當年有百萬人上街聲援學運，又有民間帶錢上去捐助喺天安門嘅學生。我哋冇時間可以悼念咁多嘢，梗有一個優先次序。
六四係人哋國家嘅事？呢個想法好天真。香港唔係台灣，97年開始我哋已經有解放軍駐港，特首同高官都係中央任命。你唔想承認都好，香港始終係中國一部份，我都唔想承認呢個政權，但係如果話內地民運同香港無關，係好天真嘅諗法。
大家嘅敵人都係中共，金金大師（梁金成暱稱）做緊嘅嘢係乜？驅蝗行動都係想影響阿爺，因為梁振英話唔到事。同悼念六四活動一樣，對頭人都係中共。一個人可以好多重身份，可以係地球人、香港人，亦都可以係中國人。城邦派爭取民主嘅方式太天真，脫離現實。佢哋好鍾意話我大中華膠，我覺得大中華同本土概念冇衝突，一個人可以關心菜園村，亦可以同時關心李旺陽。
每年六四維園集會尾聲，我哋都會呼籲集會人士參加7.1遊行，呢一點就係扣連住本土運動。好似佔中商討日咁，單純商討梗係冇用喇，但係商討日為日後嘅行動作好咗準備。
北京如何看港人悼六四？
「六四係一國兩制嘅象徵，不過維園集會只係一個花瓶」
梁：幫內地爭取民主，香港就有民主？我覺得好好笑，咁多年支聯會嘅聲音帶唔帶到上去？中共忌諱香港悼念六四？我覺得唔係，如果係就唔會畀你搞，會搵方法唔畀你租用維園足球場。我哋要好似當年嘅北京學生咁，用自己身軀行出嚟爭取，唔係悼念。六四係一國兩制嘅象徵，不過維園集會只係一個花瓶，所以中共樂見其成。
薪火相傳有需要，但係等下一代知道六四歷史，可以靠學校講，我都係從老師口中得知，唔需要靠六四集會。香港重光紀念日以前係公眾假期，好多人為咗二次大戰犧牲，點解𠵱家冇咗？呢啲歷史唔需要相傳？
「唔單止係香港嘅事，亦係全球見證住我哋追求普世價值嘅決心」
林：你諗下六四集會冇人參加，客觀效果上邊個最開心？一定係中共同特區政府。好多內地同海外維權人士每年睇到香港嘅燭光都好感動。六四燭光集會已經唔單止係香港嘅事，亦係全球見證住我哋追求普世價值嘅決心。
集會嘅意義，簡單嚟講就係反共，令到呢個力量延續。反洗腦國教運動都係多年六四集會播下嘅種子。冇咗六四集會，我覺得會好大件事，因為六四屠城係中共嘅一個好大弱點，每年六四提醒大家呢個政權嘅暴行，同時提出追究。冇咗呢個集會，訴求喺邊度講？學校講？學校點講？有幾多老師會講？
【六四25周年專頁】燭光不滅，血仍未冷，民主中華，花果漂零。蘋果請你一同見證：良知，從未貶值！ http://64.appledaily.com