【本報訊】馬鞍山頌安商場小商戶被逼走，街坊日後要捱貴貨。同樣是商場開荒牛的鞋店信發公司，也不獲領匯續約，最離譜是三年前續約時，領匯用盡方法玩殘小商戶，要求他自費將中英文招牌，改為只有英文招牌，「改招牌都使咗兩、三萬蚊，到頭來𠵱家連做都冇得做啦！」
鞋店老闆陳先生入行30多年，單是在頌安也做了十幾年，專賣平價返學鞋、波鞋、工人鞋，一對鞋百幾元就有交易，吸引不少街坊幫襯，街坊情由此累積下來，「好多睇住佢哋出世，細細嗰幫襯買返學鞋，到佢哋拍拖結婚生仔，再帶仔女嚟！」
要經營鞋店從不容易，他坦言自領匯接手後，租金由房署年代約7,000多元，加租至萬幾元，「有時捱到只係夠交租，有時租都賺唔到惟有自己倒貼」。他堅持做下去，只為服務一班街坊。但領匯卻用盡各種手段玩殘小商戶，三年前鞋店續租，領匯要求他將招牌改做英文名，「以前中英文招牌，𠵱家全部改晒英文名，仲要嘥萬幾二萬蚊，送貨嚟唔知，試過送錯貨」。鞋店下月結業，陳先生不捨得一班街坊，「街坊都話唔方便，又話冇咁平」。