上星期有關阿里巴巴創辦人馬雲搞足球嘅新聞引起網民極大討論，馬雲或阿里至今都冇正面回應，馬雲近日喺「來往」發表一篇大學時踢波嘅趣事，加上佢噚日被報道去咗綠城足球學校參觀，令馬雲搞波一事越來越似層層。
噚晚內地媒體報道，馬雲突然現身綠城足球學校參觀，話馬雲提議要加大投資同埋請外國教練，仲刊載咗一張有馬雲簽名嘅足球相㖭。
咪以為馬雲話請外國教練，就以為佢好熟足球，根據佢「來往」篇文講，話自己對足球興趣一直唔大，第一次、亦係唯一一次上場踢波，係大學三年級嘅事。
馬雲話當年瞓瞓吓晏覺，被同學叫醒落場，佢首次踢波被安排踢後衞，結果跑咗幾十分鐘，波皮都掂唔到，最後更加將對方開出嘅角球頂入自己龍門，搞到被教練馬上換出場，賽果係輸零比七，成件事好似星爺嘅《少林足球》咁好笑！