有一段時間，香港人見涂謹申，應該多過見特首。早一日，還見他伴着殉職領隊謝延駿哥哥謝志堅；翌日已代海難家屬發表譴責聲明，「忙到見個仔都唔得閒！」上周五，他就被中英雙語雜誌《港報》（Harbour Times）選為立會風雲議員，風頭一時無兩。從政20年，這個人稱民主黨FBI的立法會議員，最近又多了個法律界包青天的寶號，「做嘢唧……」一面尷尬。冤情多，又沒有狗頭閘，現代包公有排忙！
人質事件抗爭期間 兒子出世
上周四晚，南丫海難死者家屬與律政司會面，過去一周忙着被「拉布」的阿涂，開會、點人頭，長駐立法會，晚上又得分身與家屬開會，結果，又搞到三更半夜才回家。「有啲求助，要利用媒體施壓，但有更多，傳媒冇報道、或者根本唔方便曝光嘅，多不勝數」。言下之意，鎂光燈下的冤情，只是「面嗰浸」。
「菲律賓人質事件，牽動港人嘅心，最麻煩係涉及外國政府，惟有向香港政府、甚至中國政府施壓」。打足三年零八個月，自嘲謂近五十先「老來得子」的他，笑說行年兩歲半的獨生子信之，與大部份香港人一樣，見證了這漫長抗爭，「首次陪家屬去菲律賓，老婆仲有兩個月就臨盤，嗰時真係閃過個念頭：去咗遇意外，見唔到個仔出世點算？」
最令他回味的，是為好友權充形象顧問和大公關！「志堅平時牛記笠記，見啲外交人員，我會提佢執正啲；最搞笑係佢每次見記者都話驚到腳震，我寫定答案俾佢練習，但每次佢都答得好過晒我啲答案！」
因着律師背景，經他處理的法團糾紛超逾千宗，「何文田俊文苑搞足三年，仲有無數五、六層樓高嘅單幢樓」。未計無數醫療失誤及涉刑事的申訴，由港人工程師在沙地阿拉伯工作期間遇害，到警察線人投訴警察「過橋抽板」，但數最驚險的，他說要數早年一宗勒索案申訴。
「嗰時立法會仲未搬，電郵又唔普及，夜晚7點鐘助手先攞咗叠傳真叫我睇睇，一睇就知大鑊，10點約個申訴人上嚟立法會，叮嚀看更鎖晒前後門啲門，傾咗一粒鐘就決定報警，重案組午夜12點落口供，七日就破咗案。」
「累積咁多年經驗，已經學識啲竅門，唔會單單申訴都要企硬搞大佢，有時軟攻，效果更意想不到」。他的絕招是幫求助者寫投訴信，但「cc」埋自己名字，「我個人好實際，無非都係希望搞掂件事，個cc係想暗示係最後通牒」。這招「借力打力」看似好使好用，下次見到有涂包公寶號的「cc信」，應心神領會了吧？
記者 呂麗嬋