2014年至今，五個半月來發生不少慘事，如馬航MH370失蹤，至今未明其所以，南韓輪船「歲月號」沉沒，土耳其煤礦災難，這三大意外的死亡人數加起來，接近800人，救援組織竟無能為力，此外還有烏克蘭分裂，泰國政治動盪，越南反華，還有尼日利亞的極端伊斯蘭組織綁架284名少女學生，聲言把她們賣作奴隸等事，令人髮指！
有咁多悲痛意外，人為災難，盡顯新興世界之軟實力不足，每有事故，世界言論就有一條共通線路，就係希望美國出手幫忙，至於平時反美、厭美、罵美之事，禍到臨頭，唔顧得咁多咯，呢個世界係需要警察維持秩序嘅，而整個地球，只有美國有資格做世界警察，好似尼日利亞綁架女學生咁，各國束手無策，女權分子唔多出聲，歐美名人話聲援，其實得把口，除非奧巴馬肯出兵，否則冇人會救嗰啲女孩子出生天。近啲嚟講，菲律賓南部激進分子綁架中國旅客，咪又係叫天不應，叫地不聞。
美國人已經做世界警察做到怕，收兵回朝，各地恐怖分子，激進派幾乎可以橫行霸道，中國人出外旅行，最好都係小心啲，作為中國人中文傳媒，就算實際上幫唔到手打擊恐怖分子，都唔好將佢地美化。近日在中文傳媒上出現一個極度令人憎厭嘅名詞。就係「博科聖地」，此尼日利亞恐怖組織嘅英文名字叫做Boko Haram，原意完全扯不上一個「聖」字。肥仔睇見「博科聖地」就火滾，走去問印尼回教徒朋友，Haram是甚麼意思，印尼朋友話係forbidden，sinful（禁止，罪惡的），且上網查看，Boko泛指書本、讀書、教育（特指腐化西方教育）等等，故此非洲一啲專家認為Boko Haram可以意譯為"western education is sinful"（西方教育是罪惡的），呢個組織故意綁架女學生，除咗認為伊斯蘭女孩子唔應該讀書之外，受西方教育更係罪大惡極，必須禁絕，有違者應受最大懲罰，賣作奴隸。咁講法，將Boko Haram譯為「博科聖地」，簡直荒謬絕倫。左丁山強烈抗議蘋果日報繼續使用此譯名，有知識嘅記者、編輯更應拒絕使用「博科聖地」嘅譯名。絕對歧視女性嘅組織點配得上「聖地」呢類含有讚美崇敬意思嘅中文名稱？