為咗備戰世盃，荷蘭喺上星期六約咗同樣打入今屆決賽周嘅厄瓜多爾踢咗場友誼賽，最後「橙衣兵團」喺先落後1球嘅情況下，憑隊長尹佩斯嘅世界波於主場以1:1逼和對手。睇嚟盛傳會執教紅魔嘅荷蘭教練雲高爾，會將曼聯隊長臂章交畀呢位愛將。
雲高爾賽後讚不絕口
賽後荷蘭教練雲高爾又再被問到係唔係已經確認成為曼聯下季領隊，佢仍然係死都唔肯回應。不過佢同曼聯前鋒尹佩斯關係極好就係大家都知嘅事實嚟，雖然喺荷蘭對厄瓜多爾嘅比賽當中，球隊只能逼和對手，但係佢賽後就對入波嘅尹佩斯讚不絕口：「我哋見到一個絕妙嘅入球，佐迪卡斯嘅傳送非常之好，但係尹佩斯埋門一腳就更加不平凡。」
講到咁，難怪有人估計，雲高爾做咗「魔君」之後，會將維迪留落嚟嘅隊長臂章交畀愛將尹佩斯啦。如果係真，我求大俠就真係戥朗尼唔抵，之前已經一路俾基斯坦奴朗拿度（C朗）食住，要做「老二」㗎啦。論喺曼聯嘅資歷同地位，朗尼都好適合做隊長，點知冇幾耐之前都仲係阿仙奴「第1粉絲」嘅尹佩斯嚟咗冇耐，就有機會扒佢頭做隊長，朗尼點都唔服啩！
拍韓食廣告亦缺朗尼
不過朗尼人氣最近唔夠勁又係真嘅，早前有韓國食品公司搵3位曼聯球員拍廣告，尹佩斯擔大旗，仲有迪基亞同小將贊奴沙，但就冇朗尼份。講番個廣告，韓劇最近風靡全港，但呢個韓國肉丸廣告嘅質素就真係差咗啲嘞。個廣告只係將3位球員嘅踢波嘅片段同間公司嘅產品梅花間竹咁播出嚟，3位球星同啲食品可以話係毫無交流，淨係最後一人攞住一盒食品，目無表情咁講咗句口號。成個廣告又hard sell又冇內容，我求大俠認為，簡直就係失敗！