服務無綫20年的資深化妝師張家萬（Gary），上月29日因心臟病猝逝，終年39歲，昨日於沙田寶福山設靈及舉行追思會，陳志雲、曾志偉、胡定欣、蕭正楠、黎耀祥、張可頤、方中信等現身致祭，陳志雲離去時剛巧遇上昔日叛將崔建邦到場，兩人互望一眼冇打招呼。
麥潤壽：佢為人化笑容
胡定欣因趕開工逗留20分鐘，她眼泛淚光說：「未接受到呢個事實，好唔捨得，佢好專業，又帶畀人開心。」黎耀祥亦傷感說：「睇住佢入無綫，大家拍劇時玩得好癲，一齊食消夜，我老婆亦對佢讚不絕口，佢個人好開心，相信佢家人好難平復，始終咁後生同突然！」另近日受愛情三角錯困擾的蕭正楠，離去時婉拒受訪：「呢個場合唔好。」
Gary的姐夫DJ麥潤壽眼濕濕說：「我見到佢時已經走咗，但個樣好安詳，好似瞓着咗。」麥潤壽透露會以大姐夫身份在靈堂上致辭，他說：「佢不單為藝人的面容化妝，更為藝人的面容化上笑容！」Gary亦是歌手麥家瑜的表姐夫，她說：「佢好照顧我，教我化妝好多提點。」
志偉：終同肥姐相聚
傍晚6時追思會開始，曾志偉致辭時哭着說：「Gary係一個好好同事，自己真係接受唔到。」志偉因情緒太激動，停了一分鐘後續說：「佢幫獎門人化妝力求完美，肥姐（沈殿霞）終於有人幫佢化妝，Gary終於可以同肥姐相聚，我有句說話想同Gary講，我哋會好好照顧阿雪（Gary太太），你安息啦，我哋好快見！」而Gary太太致辭時爆喊，希望來世可以跟他再做夫妻。
Gary曾是陳志雲的御用化妝師，現職商台首席智囊的陳志雲，於昨晚商台播出的《寫生活》節目以「生死之交」悼念故友，志雲透露「ICAC事件」後一星期，自己要出席港大講座，Gary主動提出幫忙化妝並陪同出席，志雲說：「佢對我嘅無私照料、無限支時、絕對信任，到呢刻仍然銘記於心。」另志雲昨現身灣仔會展的巴塞爾藝術展，透露有意找楊思琦到商台開咪。
採訪：譚倩宜
攝影：黃偉雄