周日進行嘅羅馬網賽女單決賽，1姐莎蓮娜（圖）對住賽事10號種籽、8強淘汰咗李娜嘅意大利球手艾蘭妮，都唔係易應付㗎，結果第１盤要僵持50分鐘，細威先贏到6:3。不過到咗第2盤形勢完全一面倒，細威用咗21分鐘就請對手食咗6隻光蛋，贏到呢個女單獎盃。細威除咗贏到個人職業生涯第60個WTA巡迴賽冠軍，仲係2014年第1位贏到3個比賽嘅球手㖭。