年初時，大家對後市都看得較樂觀，唔少人覺得1949點「建國底」已經係低無可低，不過，現實同想像總係有落差，宜家睇返轉頭，赫然發現原來A股與港股年初至今嘅高位都係1月2日，之後就已經散晒，淋了大家一盆冷水。
大市唔好，又興起炒股不炒市，今年頭兩個月，新經濟股、博彩股同手遊股之類，輪流熱炒，但係喺3月14日，人行下發文件，緊急叫停虛擬信用卡產品以及線下條碼支付，本欄也危言聳聽地寫了一篇「舊領呔」的文章，在此及電台節目中都叫停炒新經濟股，結果一份文件將所有熱炒股打沉。
既然本欄最早睇死騰訊（700，臨時編號2988）股價，而上星期騰訊公佈業績比市場預期的更強勁，都係時候要跟進一下是否應該倒轉槍頭。
阿里快上市 有心人力托
其實，只要看看附圖，就可以睇到騰訊過往及今次強勁的業績，否則都唔會可以由2004年以3.7元上市（按除淨後調整價，約為0.73元），升到上去最高635元（除淨後調整價約為126.7元）。
不過，唔好唔記得，騰訊由600幾蚊回落到400幾蚊，其實業績係冇走過樣，事實上，佢上一次公佈的業績亦唔算太差。
但點解佢由635元跌了近160元呢？究其原因，只為中央有話兒。騰訊之所以業績強勁，除非常高的市佔率、強大的滲透力……（下刪100字），點都唔少得有點點保護主義，要阿爺有一定程度的默許。
言論控制是中央的必殺技，但突然一紙文件打在騰訊致力發展的業務，多多少少會令人困惑。所以，業績好不能解決長期問題，加上「咁巧合」拆細前出靚業績，多心令人亂估其收入支出季度調前調後，所以我未敢對騰訊長期看好。長期未看好，又不等同睇淡，我估騰訊6月中前無得大跌。
當中有三個原因，其一係阿里巴巴預期最快在三個月後上市，如果我係有心人，我都會諗方法托住騰訊，始終，騰訊貴一蚊，自己冇賺多一蚊都有五毫，部署了這天那麼久，點都唔差在最後一米，所以一定李靖托世。
其二呢，是6月份屬中國的政治敏感月份，作為互聯網巨企，最大言論群組平台，點都會盡力配合，既然你敬我一丈，我會敬番你一尺，所以暫唔會再有文件出來。
第三，近日中國與東南亞鄰國爭端不斷，以兵家慣例，必定先安內，然後槍口一致對外。先前打貪腐，將會在這個月暫停，很多熱炒股的股價都因這潮反貪腐而回落，現在恐怕有一陣子停火期，急跌的個股都會唞一唞，而槍口對外，言論平台又是精忠報國之時。
我相信騰訊的股價唔太差，我會short put；甚至，大市亦都應該回升，所以就算上周四晚美股大跌，上周五我也在DBC小炒王國內稱，睇22900至23000點，一個月內見真章，且看今鋪美股影響大還是阿爺手瓜強。
張士佳
筆者持有騰訊認沽期權短倉