廣告成與敗，有時候都睇重觀眾取態。點解韓劇《來自星星的你》千頌伊可以踩住對Jimmy Choo周圍行；May姐卻不可拎雞汁教煮餸？植入式廣告不止於公仔箱，電影、報紙、網絡game，甚至智能手機短訊都可以有。強國白酒品牌劍南春明白內地市場肅貪倡廉，揼本喺內地宣傳猶如掟錢落海，於是劍南春決定到夢工場荷李活博一鋪。Sony電影最新發行的《蜘蛛俠：驚世現新》，當中一幕講述蜘蛛俠在紐約時報廣場救人時，蜘蛛俠背後嘅霓虹燈閃出「劍．南．春」商標及獨有紅色酒樽。劍南春喺戲中出現嘅一瞬間，業界估計最少值1億元人仔。
其實強國企業早喺五年前，神不知鬼不覺走咗入荷李活大銀幕，靠植入式廣告同觀眾見面。2009年，內地服裝零售品牌美特斯邦威曾經喺派拉蒙嘅《變形金剛2》登場。《變形金剛3》中演員仲揸住一盒伊利牛奶。強國企業得以躍登國際大銀幕賣廣告，影工廠娛樂應該係最大推手。影工廠表示此廣告套餐極受內地企業歡迎，既可提升知名度，又可令產品「升呢」，但最重要係價錢實惠。據報，喺荷李活電影賣植入式廣告嘅價格，同喺內地大製作嘅電影相差不多，一般電影植入式廣告費由幾百至幾千萬人仔。
今次劍南春喺《蜘蛛俠》植入廣告得唔得，要拭目以待。不過，有網民話睇完覺得劍南春嘅紅色酒樽，同蜘蛛俠嘅紅色衫幾襯喎！
C+B
本欄逢周一刊出