利豐（494）行政總裁（CEO）樂裕民（Bruce Rockowitz）上年被減薪，皆因利豐前年業績走晒樣，影響到Bruce嘅花紅大減。利豐搞緊分拆，如果一切順利，60至90日後，Bruce就要離開利豐，轉去分拆出來嘅利標做CEO喇。呢段時間Bruce應該要落力跑數，唔知仲抽唔抽到時間去睇老婆李玟（CoCo）演唱會呢？
CoCo今年7月初將會跟音樂人趙增熹開一場慈善演唱會，呢個演唱會特別在，OK便利店竟然有份贊助。印象中好少見呢間公司參與呢類贊助活動。
OK便利店嘅母公司利亞零售（831），跟利豐係姊妹公司，同樣屬於馮氏集團。雖然兩間公司係獨立運作，但利亞一搞贊助就搵正CoCo，唔通利亞嘅管理層有參加Bruce與CoCo嘅婚禮，所以一早已經睇中呢位「國際天后」？