金沙中國（1928）喺澳門開設嘅首間賭場澳門金沙眨眼開業10年，集團主席Sheldon Adelson（艾德森）雖然行動唔多方便，但上周五佢都專程由美國飛去澳門，為自己嘅親生仔澳門金沙，慶祝10歲生日。
金沙中國要喺「賭王」何鴻燊嘅地頭搵食，當然一啲都唔容易。艾德森憶述，自己初初去澳門投資，澳門金沙只係佢地臨時嘅基地，因澳門政府話已經喺路氹準備咗幅地俾佢。點知艾德森去到現場一睇，乜地都見唔到，原來當時路氹仲未填海，佢只係見到一片海。
不過艾德森花上10年左右，就喺當日連地都冇嘅路氹，起咗兩個大型賭場，近排金沙中國仲超越埋何鴻燊嘅澳博（880），以市佔率計成為濠賭一哥，認真厲害。
咁短時間有咁好成績，艾德森話除咗要多謝一班夥計外，仲要多謝佢太太，佢話「每個好女人背後都有個好男人」，讚老婆之餘，順手兜個圈讚埋自己。佢仲講到眼濕濕，但為咗保住強人形象，佢拎住張紙巾抹眼嘅時候堅持話，「我唔係喊呀，我流汗咋！」