世界盃又到，歷史在重現，就如你我每日嘅生活一般，每朝諗住會唔同，每晚發現又係「copy & paste」，闔埋眼又為明天許同一個願。
1） 4年前嘅主辦國南非好危險，治安好差；4年後嘅巴西一樣話係咁危險，治安仲差。
2） 4年前要畀錢先有得睇晒；4年後都係。
3） 4年前世界盃期間，商場變晒球場；4年後，更多商場有波踢。
4） 4年前有球迷想去朝聖但行唔開；4年後都仲係咁諗。
5） 4年前雜誌報紙電視台嘅世界盃歷史，介紹緊第一屆世界盃冠軍係烏拉圭；4年後講嘅內容一模一樣；起碼冇竄改歷史。
6） 4年前大家話美斯攞乜都假，攞唔到世盃就唔係「真球王」；4年後，佢都仲係「A貨球王」。
7） 4年前C朗單天保至尊；4年後佢隊葡萄牙都仲係得一對腳。
8） 4年前嘅伊度奧好老；4年後嘅佢仍然係咁老，但仲踢緊。
9） 4年前嘅碧咸冇份踢但有去世界盃；4年後嘅佢肯定冇份踢，但就唔知會唔會去呃上鏡。
10） 4年前冇人睇好英格蘭，啱；4年後都係冇人睇好英格蘭，啱住一半先。
11） 4年前大部份球迷支持嘅球隊都輸咗；4年後都會一樣，因為32隊之中只有1隊攞冠軍。
12） 4年前你嘅另一半問你乜嘢係越位；4年後（如果仲係同一位另一半的話）你可以繼續努力解釋。
13） 4年前你份人工一大截用嚟買新波衫新鞋新電視；4年後你份人工一樣係咁多。
14） 4年前我去咗南非，我阿媽話好擔心；4年後我去南美，我阿媽又話好擔心，咁若果我再4年後去南極呢？
KEYMAN
now TV主持