上星期二到沙田香港文化博物館參加一個展覽會開幕禮。下午六點半到達沙田，本來無甚興趣，不過有咁啱下午要到九龍辦事，於是就順便到沙田一行。的士司機竟然唔知沙田文化博物館位於何方，只好話俾佢聽：在馬鐵車公廟站後面，近新城市廣場，司機哦咗幾聲，似大夢初醒，好快就去到。香港文化博物館當初不知何故，設於沙田，大概係因為沙田有地之故，但不少人唔慣到沙田睇文化展覽，平日人流可能少啲，假如係位於尖沙咀或西九，相信人流必然劇增。
今次呢個展覽夠特別，自細喜歡睇日本卡通一代必然要到場觀看。展覽名稱對左丁山呢類老餅嚟講，似乎生疏啲，就係「吉卜力工作室場面設計手稿展．高畑勳與宮崎駿動畫的秘密」，吉卜力工作室就是Studio Ghibli，負責將宮崎駿的創作製作成卡通電影嘅。
展覽由康文署主辦，馬會獨家贊助，是故開幕禮有三人致辭，分別係民政事務局常秘楊立門，賽馬會慈善事務執行總監蘇彰德與吉卜力工作室社長星野康二，蘇彰德致辭時講及佢本身係宮崎駿粉絲，讀書時已追睇佢嘅漫畫與卡通電影，左丁山MCC，細細聲問吓隔籬嘅馬會靚女公關S：「即係邊啲電影呀？」靚女S望左丁山一眼，以為左丁山唔係香港人，然後講出三四套戲名，就係「龍貓」、「飄零燕」、「魔女宅急便」……唉，唔駛靚女S再講咯，自己都懂得仲有「千與千尋」、「天空之城」、「崖上的波兒」，嘩，一言驚醒之餘，恨不得立即一睹手稿為快，於是剪綵儀式完畢後，立即掹車邊，跟住新亞師弟吳志華博士（康文署助理署長）與一眾主禮嘉賓走入會場，內有1300多幅經典動畫作品嘅場面設計手稿，幾難逐一仔細鑒賞，但好易睇得出嘅就係，每幅手稿都係宮崎駿嘅鉛筆素描，全無電腦輔助，每幅都畫得一絲不茍，詳盡仔細，直情係成擔心血付諸紙上。睇吓睇吓，想起藝術B在大專設計課程上講書，第一件事係教學生基本素描，用鉛筆勾畫出腦海中嘅設計意念，點知學生竟然話，用電腦畫咪得囉，仲用人手素描，out晒嘞，藝術B為之啼笑皆非。
今次呢個展覽去到八月三十一日，逢星期二休息，今日星期日，啲年紀在50歲以下嘅人士，不如坐火車到沙田大圍站轉乘馬鐵，在車公廟站落車，入博物館參觀一番，找回童年追「飄零燕」嘅回憶，包保睇得開心。