雷霆喺NBA西岸次圈雖然淘汰咗快艇，不過代價認真大，大前鋒伊巴卡（中）因為左小腿受傷，緣盡今季季後賽。雷霆冇咗呢位季後賽平均得12.2分同7.3個籃板球嘅內線大將，損失真係大。相反，雷霆西岸決賽對手馬刺，就一片好景，因為控衞柏加上周六啱啱慶祝佢嘅32歲生日，亦都克服大腿嘅傷患，可以喺周一開打嘅首戰上陣，令馬刺連續兩季打入總決賽嘅呼聲高唱入雲。