關仁隱事:得罪公司老闆「小書」姦情被偷拍 - 關仁

關仁隱事:得罪公司老闆
「小書」姦情被偷拍 - 關仁

內地男星「小書」有老婆仔女仲要咁風流,同另一位女星搞埋一齊,佢老婆雖然嬲爆,但為顧全大局都要忍辱負重撐小書。關仁喺北京聽咗知情者講,話小書因為得罪咗某影視公司老闆,呢位老闆知佢同內地一位姐仔搞埋一齊,所以俾咗100萬某狗仔頭,叫佢哋去偷影小書姦情,然後賣畀傳媒,等佢身敗名裂。狗仔賣相俾傳媒又得到100萬,結果一輯偷情相,賺咗200萬,真係太好搵啦!

肥球暗交坦蕩

呢班狗仔最近又盯中「肥球」同「坦蕩」呢一對,肥球又係有老婆仔女,仲有一個好固定嘅小三,但佢同坦蕩拍完一部戲後,兩個人打得火熱,早排女方曾經放煙幕同一位廣告佬拍拖,但實際佢係同肥球暗交咗成年啦!
撰文:關仁