難得可以同冠軍咁接近，阿仙奴一眾球員當然特別認真對待今晚嘅決賽，希望可以終止錦標荒，一吐污氣吖嘛。今季表現一直都好好嘅中場球員艾朗藍斯，就特登為今晚嘅決賽，整咗對新嘅白色波砵，上面除咗繡上藍斯仔個名、「冧巴」同威爾斯國旗外，仲繡埋「2014英足盃決賽」，夠晒紀念價值。唔知藍斯仔今晚會唔會着住呢對缽入波，幫兵工廠實現冠軍夢想呢？