即係咁，講起哥斯拉，除非大家未出世，就算係90後都知係經典日本特攝片裡面隻大怪獸啦！
其實自1954年，哥斯拉一直係日本怪獸電影嘅龍頭，大家即使知道哥斯拉係人扮，都會一路睇住佢點樣同共其他怪獸打過你死我活，其實，大家可以喺今年再見番呢隻猛獸，都有一段經歷o架！
98年美國嘅SONY電影公司，向「哥斯拉之父」日本東寶電影公司買咗哥斯拉嘅版權，仲諗住拍一個三部曲，點知當時隻「新哥斯拉」俾人彈佢似足隻速龍，仲要「瘦蜢蜢」一啲都唔型...只係因為電影公司唔想冇面，惟有將佢改名「Zilla」，當係另一隻怪獸。三部曲？當然係俾人收埋櫃筒底啦！而日本版嘅哥斯拉，就以04年嘅《哥斯拉終極戰》(ゴジラFinal Wars)為其50周年劃上咗長達10年嘅休止符。
好喇，10年過去，哥斯拉嘅版權今次落入Legendary Pictures同華納電影公司手中，加上有埋東寶「監場」，瘦蜢蜢哥斯拉終於增磅回歸，經典形象再現，唔知，佢能唔能夠贏到哥斯拉fans嘅歡心呢？