普選討論進入關鍵時刻，但泛民就越走越遠，真正親者痛入心。八方早兩日見到人稱阿涂嘅民主黨立法會議員涂謹申，只見平時鬥志激昂嘅佢，聽到泛民分裂都擰晒頭，八方見佢咁愁，忍唔住發牙痕，叫佢不如搵番2005年登廣告嘅「民主阿伯」出山，團結吓香港人都好吖嘛。當年呢位78歲嘅無名阿伯，透過阿涂用咗30幾萬，喺五份報章登廣告，嗰句「告訴我，我會看見普選的一天嗎？」（圖）入心入肺，名副其實係一位阿伯激起千重浪！眨吓眼近十年，阿涂話，阿伯今年已八十有七，托賴仍然身體健康，日日游水游到幾個塘，對時事仍然有火，可惜十年又十年，普選仍未見影，真係諗起就悲咁話。