合和實業（054）太子爺胡文新今年初做埋戲院生意，將旗下九展裏面嘅保齡球場，改裝為戲院The Metroplex。呢個戲院會播另類電影，一齣有關劏房小朋友生活嘅紀錄片《子非魚》將於周日作首映。
Metroplex早前播過有關學民思潮黃之鋒嘅紀錄片《未夠秤》，另一紀錄片《子非魚》暫定上映4場，主要關於鮮魚行學校兩名基層小學生嘅生活，其中一位小朋友住喺劏房，缺乏物質生活。
80後導演冇諗過回本
樹仁大學畢業嘅80後導演黃肇邦坦言，呢類紀錄片最難係等排期上映，原先希望舊年底，但遇着聖誕、農曆新年、奧斯卡等黃金檔期，一直上映無期，最終由Metroplex獨家播映。
黃肇邦2011年向CNEX基金申請到8萬元進行拍攝，坦言冇諗過回本，純粹希望拍一齣紀錄片反映呢班基層小朋友嘅生活。