西維爾9年第3次贏得呢項錦標（包括前身歐洲足協盃），歷來有祖雲達斯、國際米蘭同利物浦做到。而佢哋喺歐霸盃封王，亦意味今季兩大歐洲賽都由西班牙球隊贏得，認真威水。唔知係開心得滯定真係同隊友有超友誼關係，西維爾隊長拿傑迪錫（左）捧盃後開心到同隊友丹尼爾卡列高嘴對嘴慶祝，不過呢位喺決賽滿場飛嘅克羅地亞中場賽後就冇解釋，亦拒絕透露會唔會好似傳聞咁喺季後離隊。
西維爾今夏勢拆骨
不過西維爾一直以嚟都慣咗將上位嘅主力高價出售，上年就賣走咗尼格度同捷西斯拿華斯，所以今次奪冠功臣喺季後被賣走一啲都唔出奇。
西維爾今屆有得踢歐霸已經有運，因為馬拉加同華歷簡奴被禁賽，令佢哋上季西甲排名第9都仲可以參賽。球隊今屆淘汰賽都幾次絕處逢生，可以捧盃真係一啲都唔容易。