端午節都未到，市場上就有月餅宣傳？係呀，九龍樂善堂自從前年同前半島酒店糕餅廚師黎嘉明合作，大賣奶黃月餅（圖）後，由於唔少食客都覺得水準拍得住半島酒店嘉麟樓月餅，所以連續兩年添食。
樂善堂今年又再推奶黃月餅，仲搶閘先過嘉麟樓，𠵱家開始已做early bird，畀人提早訂購喇，原本要＄268一盒，但8月10日前落單，就可以優惠價＄248訂購，每人最多訂30盒，所有收益扣除成本，會用嚟協助有特殊學習需要嘅兒童，為佢哋提供評估同治療。
八方聽聞，嘉麟樓嘅奶黃月餅6月就有得訂，咁樂善堂今次提早出擊，似乎要挑戰嘉麟樓嘅霸主地位喎。