李思欣同老公范振鋒結婚後，佢哋兩公婆嘅信用卡成日撈亂用，日前兩公婆出去撐枱腳，范振鋒埋單嗰時先至發現自己張信用卡碌唔到，打去信用卡中心問，先知道爆額，佢網上查數發現原來張卡俾人盜用。
思欣噚日喺電話度話：「老公發現有個外國網站，連續幾日，日日過佢788蚊，夾夾埋埋過咗十幾次，加上我哋又食飯同買嘢，所以幾萬蚊限額好快就爆咗。信用卡中心有個員工回覆話會跟進，呢幾日佢哋又話要我哋畀最低付款，同埋過期付款罰息，我哋覺得唔合理。」范振鋒有懷疑係老婆思欣曾用張卡網上購物而出事，思欣話：「以後網上購物要更加小心。」
范振鋒日前到電影《尋愛事務所》現場探老婆班，仲同思欣喺戲中嘅囡囡一齊影「全家福」。
撐思琦離開無綫
對於楊思琦離開無綫，本月底約滿都唔續約嘅思欣大表支持，佢話：「思琦係單親媽咪，精神同能力都唔易，我一定撐佢，其實唔續約係好事，始終外面空間好大，以思琦知名度一定有更好發展。」
撰文：馮仁昭