政改首輪諮詢啱啱結束，五個月以嚟，政府除咗收到13萬份意見書之外，政制及內地事務局局長譚志源仲有意外「收穫」，就係多咗17磅肥肉喇，唔通局長又學網民「暴食爭普選」？
政改三人組噚日同傳媒午宴，八方留意到局長件西裝有啲緊，睇嚟政改都冇影響局長嘅胃口喎。局長苦笑話，政改諮詢五個月，一日走幾場飯局聽政黨、各界意見，難免食多咗，而且座談會咁多，坐得耐又冇時間做運動，咪搞到發福不少囉。
局長仲自爆，之前體重徘徊喺180磅左右，𠵱家已經飆升到197磅，直言「心理關口」係200磅，如果過咗就大鑊。
距離第二階段諮詢仲有段時間，譚志源笑言要趁空檔減磅，𠵱家一個星期健身兩次，又跑吓步咁，不過佢計過，跑咗一個鐘，其實只消耗到一條春卷嘅卡路里，睇嚟要再努力啲先得喇。
講開keep fit，呢期最興梗係塑身女王鄭多燕啦，局長都聽過對方嘅勵志故事，但睇嚟對跳番part鄭多燕自創嘅FigureRobics塑身舞就興趣不大喇。
林鄭食生果越嚟越瘦
局長為政改犧牲身形，同場嘅政務司司長林鄭月娥反而越嚟越瘦，八方見林鄭喺噚日午宴食量少，幾塊生果當一餐，即時明佢嘅紙板身形係點keep！
mailto:[email protected]