【今日最優雅】
闊別本港政壇多年嘅鄧蓮如（Lydia），噚日以非常務董事身份，現身太古A（019）股東會。Lydia一襲粉紅短袖連身裙，相對其他着深色西裝嘅男董事，特別清新。佢身旁呢位就係太古大股東施懷雅家族嘅太子爺Merlin Swire（施銘倫），甚少公開露面。
Lydia偏瘦，令人最妒忌，係佢連手臂bye bye肉都冇。近睇，臉上皺紋亦唔算多，點睇都唔似74歲。
被問到養生之道，Lydia話好鍾意做運動，健身同瑜伽都有玩，鍾意到日日都做，唔做就好似若有所失。飲食就多菜少肉，佢話食好多沙律，肉就只食雞同魚。
股東會完結，有幾位小股東走去輪流同Lydia影相。作為香港第一代吒咤政商界嘅女強人，1990年取得英國終身貴族身份，但佢毫冇架子，全程保持笑容，等大家影夠先走，呢份優雅喺香港都開始失傳喇。