立法會辯論預算案無日無之，財爺曾俊華又話政府會陷「財政懸崖」，噚日仲高調出嚟話，萬一預算案拖到下個月都過唔到，有三個部門係政府唔會畀錢，事關佢哋自己有儲備，就係醫管局、教資會同立法會。政府唔畀錢立法會，好自然立法會就冇銀用，議員亦冇糧出。經民聯鼠王芬立即撲出嚟話，反對立法會用儲備嚟出糧畀議員，咪等啲拉布議員自己受番咁話。不過社民連長毛驚都未驚過，佢話「唔出糧？不嬲都係咁講㗎啦，冇糧出咪慳啲使囉」。長毛唔明㗎啦，建制派平時有水喉照，點會習慣冇銀用嘅日子，難得長毛仲幫建制派諗埋後路話：「咁咪叫（中聯辦主任）張曉明畫多幅畫囉」。