日本三井住友銀行上月委任49歲工藤禎子做董事，成為該行首位女性高層。喺男尊女卑嘅日本社會，一個女人爬到呢個位真係唔易，佢憶述初入職時，要幫男同事斟茶遞水，有啲客仲好串，叫佢畀個電話男同事聽，唔想同佢講，因佢係女人。
工藤現時嘅位置，同88名男士睇齊，雖然唔使再做阿四，但都好辛苦，佢話：「跟男高層開會，全部着住深色西裝，搞到佢精神緊張。」
根據日本婦女創新網絡數字，日本金融業界高層得0.3%係女性，少過私人機構平均3.3%，亦低過美國業界12.4%。但舊年首相安倍晉三促請企業提拔女性加入管理層，當地三大銀行就接連聘請4名女士入局，其中包括前經濟財政大臣大田弘子，佢成為瑞穗金融集團董事長。
財金界近年多咗女性高層，南韓之前都有權善珠上任韓國中小企業銀行行政總裁，希望越嚟越多女性有機會發揮所長啦！