阿媽教落，沉默是金，呢句說話完全應驗喺中信証券（6030）一哥身上。佢早幾日於一個論壇上講咗一句「那天我跟工商銀行的楊行長講，工商銀行要報出來一年稅後淨利潤能達到二、三千億的時候，全國人民都會罵你的。一個服務性的機構怎麼能掙那麼多的錢，它的錢都賺到了誰的身上？」就係呢幾句，就被中信証券話影響同大客工行（1398）嘅關係，罰款120萬，今次真係一字「萬」金。
查實王東明今次言論重點有幾多人知？人就係咁，正經嘢如影響所有港人嘅政治議題冇人講，唔關你事嘅老蘭港女事件就日日講。
王東明根本想探討內地「放數」成風，令銀行集中承擔金融風險嘅問題。推高融資成本，就會扭曲金融體系，以至實體經濟。大家都耐唔時聽到唔少大公司，無啦啦走去做大耳窿。人人只係賺快錢，冇實業，呢個先係問題所在。當日央行副行長劉士余都有講相似嘅言論，只係佢冇點名。近年炮轟內銀係「吸血鬼」嘅大有人在，今次中信証券以言入罪，來得實在太唔大體。公司認為該言論影響工行形象，但係今次高調罰錢，反而惹來全城討論，工行形象咪衰多兩錢重。
另外，如果呢間年賺2,600幾億人仔嘅大行，真係一如傳聞中唔再俾中信証券承銷優先股，就真係小氣過方丈。
Fifi
本欄逢周二、四刊出