阿里巴巴於內地主要對手京東商城近日赴美上市，其全球路演程序已於周一在港kick off。當日管理層在四季搞咗場大型推介會後，翌日仲食埋「一對一」早餐，才返美續見投資者。本地傳媒雖對京東關注較少，但其實投資界對佢熱情不比阿里為低。聞說賬簿開啟首日，數小時內就已「收夠飛」。有朋友形容，這是近大半年來最熱IPO。
如齋睇市佔率，你會認為京東只係陪跑，上年市佔率得6.8%，而阿里巴巴係84%。不過京東有一項賣點係阿里恨都恨唔到。事關騰訊（700）早前入股京東，決定聯手發展網購。京東今次IPO落力sell嘅，就係騰訊會將旗下微信近4億幾活躍用戶，轉介去京東網上平台。相反，阿里流動通訊軟件「來往」仍難成氣候，所以芬佬會覺得認購京東分散風險，都係唔錯嘅策略。
馬雲現階段當然希望京東上市成功。如果京東受歡迎，對阿里今年第三季上市肯定有幫助。不過矛盾嘅係，投資者有幾buy京東，即意味市場同樣會有幾關注阿里銷售增長會否放緩。畢竟馬雲捕捉市場高位的眼光，大家早就見識過。
海迪