國泰航空（293）高層今年2月換班，朱國樑噚日首度以行政總裁身份出席股東會，有小股東喺會上發難，炮轟國泰董事局入面、兩名來自國航（753）嘅董事袋足糧，但開唔足會，朱國樑見佢咁好火，亦好識做，會後特登留低三數分鐘向小股東講解原因。
小股東梁先生做足功課，係會上第一個，亦係唯一一個舉手發問。佢質疑兩名來自國航嘅非常務董事樊澄與王昌順開會出席率低，五次董事局會議，王昌順只現身一次，照袋57萬，樊澄缺席兩次，亦袋走75萬，佢質疑國泰係唔係太慷慨。
主席史樂山解釋，兩名董事來自國航，對國泰有好大貢獻，但好難喺年報上表達出嚟。可惜梁先生唔肯收貨繼續追問，結果會後朱國樑親自出馬，坐低同佢單對單傾咗幾分鐘。