之前派完爆谷，傑志今仗搞搞新意思，出動藍色雪糕車喺球場入口冧粉絲。有得免費用門票換雪糕，球迷梗係蜂擁排隊，人龍到開場都未散，負責人話預咗2,000個甜筒，令大家可以甜住睇波。
印印撐場
雖然噚晚係傑志主場，但論聲勢阿雷馬絕對唔差。客軍球迷代表Anna話，300人之中有啲係本地印傭，有啲專登喺印尼飛過嚟，仲空運一批打氣Tee同吉祥物獅子頭套，以吶喊聲助球隊一臂之力。
熱到除衫
近排天氣反覆，早幾日先落完暴雨，但噚晚就非常熱。球迷唔使冒雨入場係好事，但要喺接近攝氏30度下睇波，又係另一番滋味，有人就選擇用場刊當扇撥涼，更加有男球迷除衫打赤膊，見到記者鏡頭影住都懶理。
