JR娶新抱，大把朋友自加州飛去參加婚禮婚宴，其中一位係左丁山識得嘅，佢以前在中大商學院教過MBA課程，與馮國經博士係中大嶺南商學院同事。呢位朋友K與左丁山重逢，自然大把嘢傾，於是請佢到上海總會吃午飯，佢居然仲記得點樣講廣東話，「清清哋！」咦，久居美國的華人，未染上美國人飲食習慣嘅咩？朋友K話：「人老咗就要聽醫生講，醫生叫我遠離fried dishes，避免累積膽固醇。」哦，即係唔食煎炸嘢箒，咪食菜、豆腐、小籠包、嫩雞煨麵囉。
問朋友K三藩市情況如何，點解會有居民追逐驅趕Google、Apple職員巴士嘅事情，難道又係本土主義？據朋友K講，美國雖然失業率仍然在6.3%或以上，勞工參與率創新低（即係好多人搵工太耐搵唔到，索性離開勞工市場），今年大學畢業生搵工亦唔容易，但三藩市非常繁盛，在South of Market區（即Market Street以南，近市中心Union Square，萬豪酒店附近）城開不夜，酒吧星羅棋布，客似雲來，原因係矽谷除咗啲大型科技公司（如Google、Apple、Yahoo、Facebook、Cisco等等）之外，其實從來都係住宅區，生活寧靜，冇夜生活，得個悶字，所以越多越多IT人喜歡住在三藩市，方便晚上輕鬆尋歡，好玩。一位的士司機對朋友K講：「現在係乜嘢世界，點解咁多年青靚女晚上飲到腳步浮浮，半裸性感咁走上我架車？」三藩市本來自由開放到極，同性戀盛行，一夜情如一夜飯咁簡單，年青男女鍾意住在三藩市，但又未必住得起噃，因為新租金好貴，只有Google、Apple啲僱員（或同類）有資格在三藩市買樓租樓，推高樓價租金，本地人好唔高興。朋友K住在三藩市豪宅區，有無敵太平洋景，但租金好便宜，因為有租金管制吖嘛，佢死都唔肯搬，業主冇佢符，一旦搬走，業主就可以向新租客收2014年市值租金，貴十倍都唔止，因租金管制係保護租客，業主收樓難，亦費事諗重建、增加新屋供應咯。朋友K亦講到三藩市有一特殊現象，就係長久以來華人在私人機構升級冇咁易，極多人考入低薪、福利保障好嘅市政府做公僕，三十年來升吓升吓，現時好多華人坐在市政府高位，掌握大權，華人比較保守，一切依足官方規矩辦事，地主要發展新樓盤，攞市政府批文冇咁易，故此新樓盤供應追不上需求，樓價自然升高啦。