立法會金融服務界議員張華峰剛剛從法國旅遊，兼參加「娛樂大亨」林建岳女兒婚禮返港，隨即進入狀態，就年尾開通嘅「滬港通」，幫中小型經紀行向港交所（388）行政總裁李小加提出各項要求。
報價機月費貴過內地
其中一樣，佢要求港交所調低股票報價月費。佢話𠵱家內地券商買港股報價服務，費用只係本港券商嘅一半，香港券商𠵱家每部報價機畀緊月費300元予港交所，連埋服務商收費，每部機月費約400元，張華峰旗下恒豐證券約有200部機，計埋每個月都使十萬八萬。
李小加早前向佢解釋，內地券商月費平過本港券商，主要因為當年喺內地做推廣，張華峰𠵱家就要求港交所將兩地收費拉平，一係減本港券商，一係加內地。
此外，李小加同佢講，本地券商就滬港通提升交易系統嘅成本好細，既然係咁，張議員就建議港交所出錢幫券商提升系統嘞。不過雙方暫時處於各自表述階段，未有共識。