我是家裏的大仔，成長中常渴望得到「哥哥」的照料，所以加入了電影圈後，群組中我是最年輕，我的稱呼是「Matt仔」，一個多麼有安全感的稱呼，叫得我「Matt仔」的，都是會照顧我的「阿哥」！十八年前因為寫《生化壽司》而認識葉偉信，第一次見面我點點頭「喂」了他一聲作打招呼，阿信望着我「我同你打過招呼啦！」我當然毫無印象「係咩？幾時？我唔知嘅！」「你梗係唔知，你都唔望人！」以當時年少輕狂的我，一定難忍被寸，會立刻開turbo誓要在極速下，諗出一句不能再絕的話來反擊，但當時我抬起頭看着他，衷心說了聲「Sorry！」然後心裏面想着「如果我有個咁嘅阿哥就爆囉！」於是我把這種感覺，放進《爆裂刑警》吳鎮宇與古天樂的一段兄弟關係裏，而此後我就多了另一個只有葉偉信才會叫我的名字「鄒凱西」。
金科玉律在其中
葉偉信大部份時間都不說話，但假若被觸動撻着turbo爆發，佢保證會達到瘋癲程度！還記得開初認識他，有次他對某些人不滿瘋狂爆發，那些年我還是會不識時務，開聲勸他別動氣「佢唔明你點鬧佢都係唔明，一陣憎咗你咪仲無謂！」現在我當然知道這些說話都只會是火上加油，所以當時葉偉信就繼續爆發「佢呢啲到大家死咗就明喇！佢落到地獄搵我報仇，但唔會搵到嘅，因為我喺天堂，到時佢就知我做每一件都係好事，早啲聽我講就唔使落地獄！」我記得當時呆了幾秒才懂反應「大哥！其實你係點諗嘢！？」
這位「大哥」說話總是令人聽得一頭霧水，你一定要聽到最尾，才知他是想說甚麼，當然好多時說到最後也依然是一個謎，最近他對「有錢」又有一個獨特睇法，他認為真正「有錢」，一定要懂得如何浪費金錢，買豪宅、超級跑車、遊艇只能顯示出你識使錢，你不停買同色同款一模一樣嘅跑車、樓同遊艇，齋買又唔用，咁先係浪費！未能物以致用的就是「浪費」，他再多舉另一個好爆的例子「你拎一千萬出嚟，專係畀違例泊車罰款，但你架車就日日泊停車場，嗰一千萬一生都未有個意義！你可以浪費到咁你就真係『有錢』喇！」我一如以往靜了幾秒，然後笑住問佢「大哥！其實你係點諗嘢！？」
有些人跟你的世界是完全相反，他們就是把你完全未發揮的一面爆發出來的菩薩，別小覷那些無聊話，金科玉律在其中，就好似有人問葉偉信，《衝上雲霄》有乜新意？「我打算以全3D拍攝，但全2D上畫！夠新意未？」笑罷仍忍不住再問「大哥！其實你係點諗嘢！？」
【鄒四的夢幻之旅】
撰文：鄒凱光
集編劇、導演、演員、主持於一身的中年漢，有着男人的浪漫。
本欄逢周四刊登