傅嘉莉(Kelly)近年由模界「翻版徐子淇」，轉戰影視圈，鄰家女生形象成功入屋，又有哪個宅男不心動？女神擇偶門檻預了高，可是Kelly只留下一句「講緣份」，本以為是偶像包袱作祟而敷衍回應，其後驚喜發現她是一名虔誠佛教徒，「講緣份」是抄經誦佛修來的大智慧，你笑她天真，她只覺你不懂而已。
撰文及造型：鄧卓嶽
攝影：周樂恒
化妝：Ray Mork of Fifth Salon
髮型：Kylie Chan
29歲的傅嘉莉，高䠷身形中德混血儿，當了模特兒多年，甜美外貌加上勤力，去年開始慢慢上位，也成為「宅男女神」之一。上階段冠名的是「吳卓羲緋聞女友」，又有傳她一早已有穩定、有家底男友，Kelly堅持感情生活尚未有着落，擇偶條件其實好簡單，「我好look for搵到真愛，好錫你，各方面好支持你，識得溝通，好錫屋企人，有才華，大前提係天時地利人和，timing is everything。」
港男細心韓男型
美女始終多桃花，哪個國家的男生最對得上眼？「每個國家嘅男仔都有佢哋嘅特徵吸引到我，我覺得每個人都係獨特嘅。歐洲人夠高大，輪廓深啲；韓國男生要當兵，身形好靚；中國同日本男生有禮貌，衣着好整齊，識得尊重女士；香港男仔我覺得好溫柔細心，自己喺香港長大，溝通上會好啲。」傅嘉莉之前提及有心儀男士與她同遊外地，出門旅行隨時有艷遇，「去到歐洲都有俾人撩過，外國人身體接觸會多啲，但係都好禮貌。不過你話真係發展一段情緣反而係朋友多，旅遊經常都識到當地朋友，發唔發展到relationship就睇緣份喇。」
夢想生個mini me
說到拍拖，Kelly明言工作以外，很少時間再去多想，皆因希望越大，失望越大，不過看到好朋友、前女子組合2R的姐姐Rosanne，嫁得好又生了兩個靚仔混血BB，依然不禁羨慕，「好多人都問我幾時結婚生仔，當然希望人生會有呢個階段，我覺得世界上有個好似你嘅小朋友出現，真係一個miracle。見到Rosanne湊仔好叻，佢個大仔Dylan一歲已經識好多嘢，覺得佢人生好圓滿，我成日鼓勵佢可以出書教人湊仔。」
事業正值上升期，今年更有份參演電影《3D冰封俠》， 對演戲的興趣，也來自多年模特兒經驗。「希望接多啲電影、電視劇，同埋會同公司製作微電影，參與嘅部分比演員再多少少，會幫手諗故事情節。」
抄佛經沖涼減壓
藝人轉型難度高，Kelly自認天生工作狂，「除咗演技之外，背對白、走位、時間顛倒，好多方面要自我調整，但我覺得機會好難得，一定要好好珍惜。」不怕苦的個性，對緊隨而來的壓力面不改容，減壓自有良方，「有時拍咗場傷心嘅戲，返屋企要release情緒，我最鍾意一邊沖涼一邊唱歌，如果有多啲時間，我會去旅行散心。呢幾年去旅行都習慣咗唔買嘢，冇schedule，鍾意瞓到幾點就幾點。」意想不到的，是原來Kelly是虔誠佛教徒，「平時會用毛筆抄佛經，又或者畫畫，只要專注做一樣嘢，心慢慢就會平靜。」
隱形千萬小富婆
傅嘉莉原來吸金力驚人，在女模時期，出名慳妹一名，買名牌、外出吃飯可免則免，所以，21歲未正式入行拍戲，Kelly已經儲夠錢置業。慳妹Kelly投資磚頭有心得，數年間買賣斬獲數百萬，去年拍劇後，知名度提升，日日開工半年收入進賬近百萬，估計現時身家早已超過千萬，名副其實是位隱形小富婆。Kelly透露希望40歲前能有10層樓揸手，下一步則鎖定在日本買商廈。
更多精采時尚內容，盡在 http://add.appledaily.com。