西九M+博物館要等到最快2017年先落成，但佢哋未開館就已經密密收購館藏。西九管理局噚日宣佈，正式成立一個購藏基金，原來獲得香港收藏家及藝術家Rosamond Brown泵水，總金額500萬元，主要係未來10年攤分嚟用。佢哋話，呢筆錢係及時雨，令M+可以喺香港巴塞爾藝術展購置藝術品，M+行政總監李立偉博士話，每年攤分嘅使用安排意味所收購嘅都可以係最近期作品。西九管理局行政總裁連納智就話，M+獲得來自本地藝術界慷慨捐贈同支持，足見香港視覺藝術領域有相當大嘅發展潛力同空間，呢啲都有助為香港及亞洲建立一所全新博物館。