早幾日娛樂版有「小方」方力申谷肌賣底褲嘅相，大家嘅焦點當然集中喺佢嘅身材，諗緊佢點樣操到咁弗，中環人就多數會望埋佢sell緊邊間公司嘅底底，查實係安踏體育（2020）搵佢推新產品，公司仲諗住靠小方谷起盤生意㖭。
安踏過往最叻賣籃球鞋同波衫，公關話，希望谷起運動配件生意，包括男性運動內衣，長遠最好將配件嘅銷售佔比，由目前約4%增至5%。小方以前都幫過安踏做宣傳，今次就淨係拍平面廣告，貪佢曾經做過傑出運動員，形象夠晒健康，喺內地又有一定知名度，但唔肯講廣告費係幾多錢。
安踏一向有賣運動內衣，小方着呢批底底，屬於新一批鮮艷顏色系列，包括鮮黃、紅色等等，相當搶眼，內地網上賣緊約40蚊人仔一條，有勇氣嘅男士不妨一試。安踏噚日收報11.24元，歷史高位都係15元，小方能否幫公司變成「紅底股」就拭目以待。