日前「飛魚王子」方力申接拍內褲廣告，狂show胸肌同腹肌，又凸顯佢嘅「過人之處」，睇到一眾港女嘩嘩聲；其實運動員周不時都接內褲廣告，唔少出名牌子之前已經搵過龍格保、碧咸、基斯坦奴朗拿度（C朗）等型男做代言人，今次CK就起用車路士嘅巴西中場奧斯卡杜斯山度士，不過佢排骨仔嘅造型，就似乎輸蝕多少。
靠煞食笑容搶分
奧斯卡初出道時被譽為新卡卡，以高速盤球同埋直線傳送最煞食，不過5呎10吋高只得148磅，點計都係奀仔一名，拍廣告時佢已經都算力谷，不過一對胸肌唔突出之餘，仲好似鬆泡泡，腹肌？勉強都數到4嚿，或者最煞食就係個張可愛笑面，加上圓眼招風耳，都算幾靚仔。其實冇肌肉，男士都可以加料吸引女觀眾，方力申就自爆拍廣告時，男人重要部份加足料，達到「玲瓏浮凸」嘅效果產生。不過唔知奧斯卡係唔係老實得滯，佢就冇加料，呢個自然狀態更加吸引唔到女士尖叫啦！
養精蓄銳世盃爆發
點都好，22歲嘅奧斯卡能夠成為繼龍格保、碧咸、C朗之後，做到國際時裝品牌嘅代言人，睇嚟廣告商都認為佢紅得起；雖然佢季尾狀態回落，喺車路士正選不保，領隊摩連奴仲話佢，上年8至12月狀態全隊最佳，但新一年就起伏不定。不過其實好多世界盃國腳，今年初都勒住勒住，又驚傷又驚扯乾體力，留喺6月巴西世界盃先大爆發；奧斯卡就同大衛雷斯、拉美利斯及韋利安3位車路士隊友，入選巴西國家隊世界盃大軍，為6奪世界盃而戰。大家到時又睇吓，奧斯卡如果入波，又會唔會好似隊友尼馬咁，詐詐諦除衫露出底褲邊，幫手賣廣告吖嗱！